पावलो पावली जाणीव होते, हो, जग सुंदर आहे!
जग सुंदर आहे जेव्हा तुम्ही सकाळी उठता आणि काही पक्षी तुमची गॅलरीमध्ये वाट बघत असतात.
हे सुंदर जग शीतल होतं जेव्हा अचानक तळपत्या सूर्यासमोर आलेला एक कृष्णमेघ तुमच्या डोक्यावर सावली धरतो.
कधी तरी दमून भागून घरी आलात की न मागता तुमच्यासमोर चहा/कॉफीचा वाफाळता कप येतो. किंवा अचानक पाणीपुरी पार्टी ठरते. तेव्हा जग खरंच सुंदर असते.
अर्थात जग सुंदर होतेच जेव्हा तुमच्या जवळ तुमचा हक्काचा जिवलग असतो.
आणि जवळ नसला तरी विरहाची सुंदरता फक्त तुम्हालाच जाणवते.
सकाळच्या धावपळीच्या वेळेत ट्राफिकमध्ये नाही अडकलात तर! न आढेवेढे घेता कॅज्यूअल मंजूर झाली तर!
आमच्या कोकणातल्या चाकरमान्यांना गणपतीमध्ये गाडीची तिकीटं आणि शिमग्याला सुट्टी मिळाली तर!
अर्थातच जग सुंदर असतं!
चित्तथरारक डिटेक्टिव्ह कथा सुंदर असते, मनाला भिडणारी कविता सुंदर असते.
चुकून आलंच मित्राच पत्र तर तोच काय, पुढचे अनेक दिवस सुंदरच असतात!
एकूण काय, तर जग सुंदर आहेच, आपला चष्मा तेव्हढा स्वच्छ हवा..
—
आदित्य साठे
२५-०५-२०२४
For my other posts, follow this trail…
