एखादं पुस्तक वाचण्यापुरते कोणाकडून उसने घ्यावे आणि वाचून झाल्यावर हे पुस्तक संग्रही असायलाच हवे असे फार फार दिवसांनी आज मनोज बोरगावकर यांचे नदीष्ट वाचताना झाले. तसे पाहिले तर हे पुस्तक वाचायला तसा ४ वर्ष उशीरच झाला. अगदी प्रकाशनच्या दिवशी विकत घेऊन वाचण्यासारखे हे पुस्तक आहे यात अजिबात शंका नाही. आमच्या नाशकाच्या वरच्या बाजूला उगम पावणारी नदी पुढे जात जात नांदेडच्या बोरगावकरांना इतकी माया लावते, हे वाचताना केवळ गोदेच्या पाण्यावर पोसलेला अजून एक पिंड म्हणून की काय माझे एक वेगळेच नाते या पुस्तकाशी जोडले गेले आहे.

विनायक पाटील यांनी पुस्तकाला अभिप्राय देताना म्हटल तशीच पुस्तकाची शैली अगदीच वेगळी आहे. पण पुस्तक खाली ठेवावे वाटत नाही इतकी मनाची घट्ट पकड घेणारी आहे. निवडून काढावे आणि मधून मधून वाचत राहावे असे खूप सारे विचारधन या संपूर्ण पुस्तकात पानापानावर विखुरले आहे.